Metropolregion

E Metropoolregioon (in dr Schwiz mäistens Metropolitaanruum) isch dr Umlandruum, wo mit ere Metropoole verbunde isch. Metropoolregioone wärde as „Motoor“ vo dr soziaale, gsellschaftlige und wirtschaftlige Entwicklig vom ene Land aagluegt.

Z Dütschland si Öiropäischi Metropoolregioonen (EMR) zum erste Mol 1995 vo dr Ministerkomferänz für Ruumornig definiert worde. Dr Begriff sött nit mit em Begriff Öiroparegioon (Euregio) verwäggslet wärde, wo Regioone bezäichnet, wo uf em Gebiet vo mindestens zwäi Staate lige. Ere Euregio säit mä nume sälte Metropoolregioon.

Im Geegesatz zun ere Agglomerazioon, wo us ere Kärnstadt und iirem suburbaane, eender dicht bebaute Vorortberiich (au Balligsruum oder Späckgürtel) bestoot, isch dr Begriff vo dr Metropoolregioon witer gfasst und schliesst au groossi ländligi Gebiet ii, wo mit de Ooberzentrum vo dr Regioon dur wirtschaftligi Verflächtige oder Pändlerströöm in ere änge Verbindig stöön. Dur d Kooperazioon in Metropoolregioone söll au d Blaanig vo Stedtebau- und Vercheersbrojekt verbesseret wärde.

Groossstedt, wo für iir Umland äänligi Funkzioone wie d Metropoole übernäme, aber mit öbbe 100'000 bis 300'000 Iiwooner chliiner si as Metropoole, wärden as Regiopoole bezäichnet. Analoog häisst iire Verflächtigsberiich Regiopoolregioon.^[1]

1. ↑ Definition | Regiopolen Deutschland. Archiviert vom Original am 4. November 2016; abgruefen am 8. Mai 2017.